حوار صريح جدا هههههههههههه
وائل : هاى .. ممكن نتعرف
سوسو : وليه لأ
وائل : مين معايا؟
سوسو : الأميرة المتمردة
وائل : لا والله؟
سوسو : والنيعمة
وائل : أهلا بالأميرة المتشردة قصدى المتمردة
سوسو (بقرف) : ايه العسل ده يا واد .. انت اسمك ايه ياض
وائل : الفارس المجروح
سوسو : لا ألف سلامة .. وده بيرسول ولا شبشب؟
وائل : لأ توكتوك .. بس توكتوك شبهك تمام
سوسو : وانت عرفت منين شكلى يا عم الدبدوب
وائل (ضاحكاً) : من الصورة اللى انتى حطاها طبعاً
سوسو (بخجل) : دى صورة الصابوه بتاعى
وائل: الخالق الناطق
سوسو : بقولك ايه .. بلاش طولة لسان .. ايه تلاقيح الجتت دى .. فكك منى بقى وروح
شوف لك حتة ناشفة تقعد فيها
وائل : بشوقك .. انا بردو كمان هروح اشوف لى محل احذية تانى
سوسو : سلام
وائل : سلام
(فترة من الصمت)
سوسو : وانت كام سنة؟
وائل : أكبر منك بسنتين
سوسو : ياليلة ملزقة .. يا عم انجز
وائل : خمسة وعشرين وربع
سوسو : إيه الربع ده ؟؟
وائل : أصل أنا امى ولدتنى فى شوال، بس كان ابويا مسافر الخليج وعمتى كانت
بتقول إن أبــ
سوسو : خلاص يابا .. انتى هتجيبلى تاريخ السلالة
وائل : وانتى كام سنة؟
سوسو : أصغر منك بسنتين
وائل: يا صباح التباتة المعجونة برخامة
سوسو : انت مش هتبطل طولة لسان
وائل : بقولك ايه مش ناقص دوشة .. سلام
سوسو : سلام
(فترة من الصمت)
وائل: وانتى ساكنة فين؟
سوسو : المهندسين
وائل : ياه .. ده احنا جيران اوى .. فين فى المهندسين
سوسو (بإرتباك) : وانت مالك فى المهندسين وخلاص .. انت هتيجى تكلم بابا ؟
وائل : صباح التدبيس .. شكلك ساكنة فى أرض اللوا
سوسو : ايه ده عرفت منين؟ قصدى فين أرض اللوا دى؟؟
وائل : هأ .. وانتى بتدرسى ولا صايعة؟
سوسو : مخلصة آداب
وائل : وعلى كدة بتعرفى تقرى؟
سوسو : طبعاً .. وبفهم لغة الحمير كمان .. اتكلم كده
وائل : بشوقك .. شكلك مش هتعمرى على ماسنجرى
سوسو : المكان بقى كله جاز
وائل : الله يسامحك .. سلام
سوسو : سلام
(بعد فترة من الصمت)
سوسو : واللى فى الصورة أبو عضلات ده يبقى انت؟
وائل : اه .. بس العضلات فوتوشوب
سوسو : وانت مين اللى عمل لك العضلات دى بالفوتوشوب؟
وائل (بفخر) : أنا طبعاً
سوسو : وانت دارس فوتوشوب فى أنهى مقلب زبالة؟
وائل : هتمثلى بقى .. الصورة دخلت عليكى ما تنكريش
سوسو : بصراحة دخلت عليا .. اول ما شوفتها افتكرتها معمولة ببرنامج الرسام بتاع
الويندوز .. ما تخيلتش انها فوتوشوب خالص.
وائل : وعلى فكرة انا لاعب فيها بالفوتوشوب عشان اصغر عضلاتى شوية .. عشان
البنات بتنهار.
سوسو : طب حاسب يا عم المبنى لتنهار
وائل : سلام
سوسو : سلام
(بعد فترة من الصمت)
وائل : ممكن اشوف صورتك؟
سوسو : أوك هحطها بس هشيلها على طول .. عشان البقر عندى كلهم أونلاين
وائل : طب ما تعملى للبقر اوفلاين عشان تبقى مختلفة عنهم
سوسو : مش فاهمة؟ بس شكلك بتشتم
وائل: لا ياحبيبى اوعى تقولى كدة اخص عليكى تصدقى زعلت
سوسو : قشطة عليك .. ما انا كدة كدة هوريك صورتى وهمسحك بعدها
وائل: موافق
(سوسو تضع صورتها لبضع ثوانى ثم تخفيها)
وائل : انتى مرتبطة؟
سوسو : لأ ومش عايزة يا عم الفارس
وائل : ولا انا .. تصدقى بدأت دماغك تعجبنى .. ايوة كدة بلا ارتباط بلا وجع قلب
سوسو : شكلك واخد تسعين قفا على سهوة
وائل: ما عاشت ولا كانت .. انا بس بحب عيشة الحرية
سوسو : قشطة عليك .. تعجبنى
وائل : طب حيث إنك ساكنة فى بولاق الدكرور يبقى اكيد بتعدى على الجيزة؟
ماتيجى نتقابل
سوسو : لأ .. ما بنزلش الجيزة .. بعدى على انور السادات
وائل : أنور ؟؟ حبيبى .. ده انا راشق هناك ليل نهار
سوسو : خلاص قشطات
وائل : بكرة الساعة خمسة نتقابل فى اتجاه حلوان
سوسو : البس حاجة مميزة عشان اعرفك
وائل : لأ هحط لك حزمة جرجير فى عروة القميص
سوسو : لأ دى تحطها فى .. طبق السلطة ..لا أنا اكيد هعرفك لإن أكيد كل اللى فى
المحطة هيبقى شكلهم محترم.
وائل (لم يفهم) : ربنا يخليكى يا مزة
سوسو: اشوفك على خير
وائل: اشوفك قدام عربية السيدات
سوسو : سلام
الرئيسية 
