هتصدقي ؟
أسامه عبد الصبور
هتصدقي يا أم العيون الطيبة
إن الزمن راجع بأيام الصبا
وإن النهار جاي ب عمار
يمسح مرار الإنتظار
ونلاقي أحلامنا البعيده قريبه
جوبيني يالا وماتدريش
معذورة لو متصدقيش
أصل السؤال علشان يعيش
لازم تموت الأجوبة
ــــــــــــــــ
هتصدقي إن العيون
هتبكي من كتر الفرح
هتصدقي غصن الزتون
لو رغم برد الخوف طرح
هتصدقي لو قولت لك
إني ف خيالي رسمت لك
صورة شراع عمره ما باع المركبة
جوبيني يالا وماتدريش
معذورة لو متصدقيش
أصل السؤال علشان يعيش
لازم تموت الأجوبة
ــــــــ
هتصدقي حلمي البريء
وهتحلميه من غير كسوف
وهتمش ويايا الطريق
رغم الحواجز والظروف
وهتفتحي حضنك براح
يغنيني عن كل اللي راح
وتمدي إيدك بالسماح
تشفي الجراح المتعبة
جوبيني يالا وماتدريش
معذورة لو متصدقيش
أصل السؤال علشان يعيش
لازم تموت الأجوبة
الرئيسية 
