انت ونصفك الاخر

كام واحد فينا ارتبط بحد أو دخل في علاقه مع حد, و كان نفسه في واحد يقول له العلاقه دي ينفع تكمل ولا لأ, كام واحد فينا كان نفسه في علامات ارشاديه تساعده علشان يفهم هو مع الشخص الصح ولا لأ, كام واحد فينا قضى سنين من عمره قبل ما يفهم أنه ما كنش المفروض يمشي في الطريق ده من الأصل, كام واحد فينا فهم بس متأخر أوي أن مش هو ده الانسان الي ينفع يعيش معاه بقية حياته.
في مجتمع زي مجتمعنا ده خيمت عليه أشباح العنوسه عند البنات, و قلة الماده عند الولاد, أصبحت فكرة انك تدور على مين الي هتتجوزه دي فكره فيها كتير من الرفاهيه, احنا كمان هنختار؟!...المهم ان احنا نتجوز و خلاص...و اهي كل الستات شبه بعضها, و ضل راجل ولا ضل حيطه برضه.
بلاش ده كله, مين فينا فاهم نفسه هو شخصيا, و عارف هو عايز ايه من الارتباط, وهو بيرتبط و يتجوز ليه, و منتظر ايه من الطرف الاخر, وعايز يعمل ايه في حياته الي جايه, و و و...مئات الواوات الي المفروض نفكر فيها, أو على الأقل أهالينا يقولوها لنا زي ما بيدلوا بدلوهم في مواضيع العفش و الشقه و الذي منه, انما لو سألت أي حد ماشي في الشارع دلوقتي خاصة الشباب الي زينا وقلت له : أنت اتجوزت ليه ؟, الرد الطبيعي جدا: ....عشان الناس كلها بتتجوز, و يضيف بلهجه فلسفيه : و دي سنة الحياه, و لو سألته: طب يعني ايه سنة الحياه دي؟, هايهرش في دماغه شويه وبعدين يضحك لك ضحكه تدل على فهم عميق للحياه و سنتها.
طيب و بعد مايتم المراد من رب العباد و نوفق راسين في الحلال, كام واحد فينا فاهم ايه المطلوب منه في الجواز, ايه هي الأساسيات و ايه هي الفرعيات فيه, ايه هي الحاجات الي يطنشها احسن عشان الحياه تمشي, و ايه هي الحاجات الي مش المفروض تعدي بالساهل, لو اختلفنا نعمل ايه, و ايه هي الخلافات الصغيره و ايه هي المشاكل الكبيره, طب و نحلها ازاي أو حتى نفكر فيها ازاي.
كل الأسئله دي احنا محتاجين حد يجاوبنا عليها, على فكره أنا مش بهاجم لا الشباب لأن أنا منهم و زيهم, ولا الأهالي لأنهم معندهمش فكره أد ايه ولادهم ممكن يكونوا محتاجين للكلام اكتر من اي حاجه تانيه في الوقت ده, أنا بس عايزه اقول ان احنا المفروض نفكر في مواضيع الارتباط و الجواز دي بطريق مختلفه بقى, أو بمعنى أصح نفكر فيها بجد.
عشان كده أنا حاولت_ قدر ما استطعت_ اني أجمع ماتوصلت اليه من معلومات تخص الموضوع ده في كتاب ( اكتشف نصفك الاخر), و الكتاب ده فيه طرق بسيطه و عمليه تكتشف بيها نفسك أنت الأول, ومنها تقدر تفهم أنت محتاج مين كشريك للحياه, ولو كنت في علاقه فعلا في باب كامل يقول لك اذا كنت انت في العلاقه الصح ولا تاخدها من قصيرها و أنت لسه على البر, ولو كنت أنت متجوز فعلا الكتاب بيشرح لك ايه هي أكتر الحاجات الي ممكن تجيب مشاكل في الجواز, و ازاي لازم تتكلم فيها و تتفق عليها مع شريك حياتك عشان الحياه تبقى اسهل, وايه هي الغلطات الخفيه و الحاجات اللااراديه الي ممكن تحصل في الجواز فتأتي بعكس ماهو مطلوب تماما.
أما لو حضرتك أب أو أم نفسهم ينصحوا ولادهم بكلمتين ينفعوهم في جوازهم, أعتقد أنك هتلاقي في الكتاب ده كلام كتير أوي ينفع في المواقف الي زي دي.
كمان الكتاب فيه استقصاء يحتوي على مجموعه أسئله تخاطب كل الفئات, بداية من الغيرمتزوجين, الى المتزوجين بالفعل, الى حتى الرامل و المطلقين, وبالاجابه على الأسئله دي تقدر تكتشف الكثير عن نفسك و تفكيرك و احساسك بشريك حياتك, و مستوى رضاك عن العلاقه ككل, و ايه الي ناقص فيها , و محتاج تشتغل علي ايه بالضبط عشان تتصلح, ومحتاج تركز على ايه عشان توصل بيها للمستوى المطلوب.
وكان مقصود في الكتاب ده أنه يبعد عن العبارات الجزيله و الكلمات الفخمه و الأساليب المعقده في الكتابه, عشان يتحقق الهدف منه و هو أن يصل الى كل الناس و بسهوله, و أن يدخل في الصميم ويلمس الوتر الحساس مباشرة بدون أي اساليب بلاغيه أو مجازات أو توريات.
مثل هذا الكتاب كثير في المكتبات الأجنبيه , لأنهم ناس تقرأ من أجل الحياه , لا من اجل التسليه او تمضية وقت الفراغ فقط , عشان كده جاء الوقت الي يكون فيه كتب زي دي في مكتباتنا احنا, بس تكون بتخاطبنا بأسلوبنا احنا , و بتتعامل مع تفكيرنا و معتقداتنا احنا, و كفانا استيرادا لكل شئ حتى الأفكار.

الحمد لله الذى لم يترك خيراً إلا وأرشدنا إليه فى سواء
فى كتابه الكريم أو في سنة نبيه العظيم عليه أفضل
الصلاة وأتم التسليم فقد قال جل فى علاه فى كتابه الكريم

الخبثات للخبيثين والخبيثون للخبيثات والطيبين للطيبات
والطيبون للطيبات اولئك مبروون مما يقولون لهم مغفرة
وزرق كريم ؟ صدق الله العظيم

اختى الفاضله رائعه هذه الآية الكريمة تتكلم عن بعض
أنواع التكافؤ التى يجب توافرها فى الزواج
فعلى الطيبين من الرجال أن يتزوجوا ممن يشاركهم صفاتهم
فلا ينبغى تزويج فاسق من طيبة أو العكس
وجاء فى الحديث الشريف قوله صلى الله عليه وسلم
تنكح المرأة لأربع لمالها ولحسبها ولجمالها ولدينها
فاظفر بذات الدين تربت يداك

مشكووووووور ليكى وعلى مرورك الطيب

لكى احترامى وتقديرى