أحس إنى .. للشاعر : فهد معتوق (ساقى الشوق)

ابيك بكلمه من فضلك .. و قصدي من وراها خير


بعبر لك عن احساس ٍ احس القلب منه احتار




احس انك شغلتي البال .. و اشوف انك في عيني غير


و الاحظ قلبي احيانا بلا قصد ٍ عليك يغار !




انا ماقول حبيتك .. و لكن كل شي يصير


شعور الحب يجي للقلب بلا موعد ولا انذار




احس اني بديت اهتم .. و ادور للـ لقا تبرير


و صارت شوفتك منوه .. و اخاف تخلّص الأعذار




انا اسف يا بنت الناس اذا تماديت في التعبير


تراني من هذاك اليوم احس العقل مني طار




نصيحه لك يا بنت الناس خذيها و اذكريني بخير


صغيره انتي ولا تدرين .. و انا بقلبي جروح كبار




انا جربت هالدنيا .. و شفت الزين و الشرّير


و ذقت اللي محد ذاقه و في قلبي الهموم اعصار




انا خايف على عيونك من اللي غايته التدبير


و خايف قلبك الطيب يصيبه جرح من غدّار




ترى في غابة الإنسان ثعابين و ذياب كثير


ولا يغرك اذا شفتي زهور و عشب او انهار




و هذا كل مافيني .. عسى ما كان به تقصير


ترى لو بيدي الشوفه .. انا ما بكتبه اشعار




و لكن يمكن الأيام .. تجمعنا على كل خير


و اخلي عيوني تشرح لك شعوري و خافي الأسرار