شبع التراب م الدم (رباعيات فكري سليم)

شبــع التـراب م الدم
وقـلــوب ملاها الهم
ضِرْيت خلاص ع الموت
وتعــــوّدت ع الغـم
***
ودا طفل كان جنبه صبيه
مترميين ع الأرضيــه
ماتو وعلى وجوهم بسمه
تسخر من الصهيــونية
***
ودا طفل واقف بجساره
وسلاحه في إيده حجاره
في عينيه عزيمه وتحدّي
ولا همه حتى الطـياره
***
وعشان كده صابرين
وع العدو قــادرين
مهـما بيـعمل فيهم
راح يفضلوا صامدين
***
صامدين بيحموا الدار
من شــلة الأشرار
ولا خوف ولا رهبه
من العـدو الغــدار
***
غدار وظلمـه زاد
منع المـؤن والزاد
قتل الطفوله ف غزه
فين الضمير يا ولاد؟!
***
باحلف يا صهيوني
وبتـينـي وزتوني
إنـي فدا بــلادي
زي اللي سـبقوني
***
إنســى تنسّيني
إنــي فلسطيني
وان الوطن وطني
ودا حبه من ديني
***
أحـلف بـدم الدره
ح تكوني في يوم حُره
ولا حاتركك يا بلادي
لو ح اتقتل ميت مره
***
لو ح اتقتل راح يطلع
في تـرابي كام مدفع
وح يـبقى دمي جنود
راح نهزمك وحترجع
***
ترجع لابوك "بلفور"
اللي لـقاك مسعور
قال يسـتريّح منك
بعـتك لنا يا شرور
***
اخرج وروح يا شيطان
داحنا اللي كـنـا زمان
مسـلم مسـيحي يهودي
عايشــين هنا في أمان
***
جيـت انت فرّقتنا
غيـّرت اسم أمنّا
نهشتها ولا يمكن
تاخدها من حضننا
***
وتعيشي يا فلسطين
صامده ليـوم الدين
مهما الصهاينه يفتروا
ويزوّرا المـلاعين