خايف عليكي يا مصر. شعر فكري سليم
خايف عليكي يا مصر
من كل إيد غادره
تتمد ليكي يا مصـر
وتعيشي يا صابره
ضباع ومتوحّشه
ونيابها مسنونه
من الصباح للعِشا
مهووسه مجنونه
مستنيينك تتعبي
وتنهاري يا صابره
خايف عليكي يا مصر
من كل إيد غادره
نهشوا بلاد الرافدين
والناس هناك كانوا طيّبين
ولا طائفية ولا فِتَن
قتلت ألوف الآمنين
مستنيين تتفرقو
ياولاد بلدنا وترجعو
للخلف ميت ميتين سنه
يا اخواننا اسمعو واعو
حافظوا على تراب أرضكم
أرض الرسل طاهره
خايف عليكي يامصر
من كل إيد غادره
يا كل مخلص لأمك
قرَّب عليها تضمك
داوي جراحها بحنانك
وامسح دموعها بكمّك
ما تكونشي قاسي عليـها
زي اللي راحوا وباعوها
واللي بياكلوا في خيرها
واخر المطاف بـكّـوها
وهِيّه يا عيني عليها
مستحمله وصابـره
خايف عليكي يا مصر
من كل إيد غادره
الرئيسية 
