من رباعيات الثورة
******
أشعار الدكتور صبرى إسماعيل
****
1-سلطان ونازل على كفر الغلابة
سأل فى أمشير وطوبه وبابه
ردوا بخير ولا نبغى السؤال
ابعد كلابك وحوش عنّا الديابة
******
2-حمامة طايرة تسبّح ربّها
سابقها حِلمها على دربها
بتنسِج م الحروف حِكمة
وعشان كِده بنحبّها
*****
3-قالوا عليهم كل يوم لوك لوك
والشاشة تهتف يافتى ما ُتشكّ
وف ليلة قامت ثورة المظاليم
من كلّ شارع والسبب فيس بوك
******
4-راحوم وصحّوا الحِلم والطوفان
والظلم سلّّط ع الفساد فِرسان
من كل شارع بالحروف طالع
يهتف سيسقط حتماً السجّان
******
5-دمياط تلاغى قنا وترّن ع التليفون
واسكندرية وطما وقويسنا مع أشمون
الكل صاحب ميدانه صمموا لازم
يرحل جميع اللّى هدموا ولبلدنا يخون
******
6-ولمحت فوق الميدان صحبة من الشهداء
ماسكين إيديهم سوا فى رحلة السُعداء
مالوا على ابن البلد وبحبهم قالوا
وصيّتك أرضِنا والأهل والأبناء
******
7-صمم وثار الدم فى الشريان
يهتف سيسقط حتماً الطغيان
والبحرالاحمر هاج بأمواجه
والنيل يواسى الزرع فى الغيطان
******
8-وف لحظة نور الفجر هلّ ولاح
لمّا تنحّى اللى باعها والميدان ارتاح
والوادى يرقص والصعيد فرحان
وسيناء تدشن أول الأفراح
*****
9-الموسكى تِهتِف والهرم فرحان
والعتبة شاركت فرحة الميدان
والليل يغنّى والنهار صاحى
إيدهم فى إيد الثورة والشُبّان
******
10-وولد صغيّر ع الطريق انزرع
لقيته فرحان بيرقص وكلّه دلع
سألته ليه انتفض بصّ لى وقال لى
اليوم دا عيدنا والرئيس اتخلع
*********
11-قطر الصعيد اشتكى إن الحديد زعلان
من زحمة الناس ووقفتهم على القضبان
قام رد مسئول كبير قال له
هو انت نايم دى فرحة ثورة الميدان
*********
12-عامل وناقم على عيشته الهِباب
يحلم ولكن حلمه بيطلع سراب
زفيت له بشرى إنّ بكره حلو
دا الكفر فارقوه جميع الكِلاب
*********
13-باقول لصاحبى مش الرئيس رحل
قال لى باينك انت راجل عسل
رؤسائنا مايرحلو إلاّ بانقلاب
أو إلى رحمة الله ينتقل
*******
14- رديت وقلت انتهى عصر الفساد
داهدفنا خيرالبلد يحيى الولاد
الكلّ عايش فى أمن ورخاء
ومفيش فرق بين مينا وعماد
الرئيسية 
