قصيدة مصر : الشاعر عبد الرحيم منصور
يا مصر ياللى طول السنين تتغنى
يا حكمه يا قبه فى ضمير الأجيال
يا طالعه من جوه الصدور بتئنى
أنة جموع وأمل وأنة رجال
خد الربابه يابن بلدى وغنى
بلدك حبيبتك نبض الموال
بلدى يا مصر .
أنا بين ضلوعك جنين .
أنا على صدرك صبى .
مليان غنا
مليان حنين
أنا في عيونك ندا .
ندا للى طالت به مشاوير الدروب
يرجع اللى غاب
ويريح الأغراب
ويفتح الأبواب
بفرحه للأحباب
أرفع جبينى واقول
يا مصر يا صبيه
ياللى في شعرك شبيه بكريه
أنتى النجوع
وأنتى الربوع
وأنتتى الحنان
وأنتى الأمان
وأنتى ابتسامة تهز غربال
الوليد يوم السبوع
ياللى فى قلبك صلى
ياللى فى عنيكى يسوع
يا مصر يا حبيبتى
أنتى البدايه
وأنتى النهايه
وأنتى ملازى حين ارتمى برأسى على صدرك
وأنتى بتحكى لى الحكايه
صوتك يصحى بكره جوايا
يصحى الأمل جوايا
صوتك يصحى الشهيد
شاورى بأيدك يا مصر
ارمى بنفسى حين عنيكى تريد
يا مصر يا حبيبتى
دايما مروح فيكي للماضى . وللآتى .
اتحنى من همك
واتعلم الصبر منك
واسمى كل اللى بحبه باسمك
تناديلى
أناديكى
وأسمع نداكى وأقول
ده نداكى ولا ندايا
ولا ندا الغلابه
ولا ندا الصابرين
أولادك القادرين
اللى سنين ماشيين
يقولولك يا صابره
طول عمرك بتدى
والزمن بياخد
وياريته يجيب
طول عمرك تعدى
ع الشوك والصعاب
والليل الغريب
طول عمرك حبيبه
وحضن لليتامه
وسكه للسلامه
دعوتك قريبه
ونجمتك غريبه
فى وسط الغمامه
خد الربابه يا ابن بلدى وغنى
بلدك حبيبتك نبض الموال
الرئيسية 
