وسابت إيدي في المولد
مهداه مع التحية لشباب ثورة مصر في جميع ميادين مصر
بحبك وانتي هاجراني
وفاكرك وانتي نسياني
وفارد في الهوا جناحي
وبحلم بيك وانا صاحي
وانا نايم.......وانا قايم
كابوس دوخني توهني
لقصة حلم شوهني
ورجعني ليوم مافلت من ايدك
بهاجس لغز تشريدك
بقى مش فاكره في المولد
في وسط الزحمه قلتيلي
انا ممكن أضيع منك
تتوه مني
ماتفرقشي !!!
مين الأول؟...هتفلت إيده م التاني
وفاكرك وانتي بصالي
برعشة نجمه بتلالي
وعينك ساطعه في عنيه
بنظرة فيها حِنيه
وقسوة بنت جِنِيِه
وانا بنده بعلو الصوت
وم الحسره سكني الموت
وتُهتي مني في المولد
أيا ويلي !!!
أقول ايه ماهو مولد
كتير ستات ورجاله
وناس كدابه هواله
ووضع الخلق متلخبط
وانا في لقاكي بتشعبط
وبرضه فيه كتير تايهين
وفي المولد أهم عايشين
أكيد فاكرا وعذراني
وحاسه مين باع التاني
جريت وشقيت وحصلتك
ومديتلك انا دراعي
تركتيني وبعتيني
وضاعت كل أطماعي
على اني هالاقيكي
في يوم مولد
بقى بتقولي مش فاكره
ولسه برضه ناكراني
بقى مش فاكرا موالي
وانا داير على مدارك
بلف بروحي في الساقيه
وانتي بقسوة مش باقيه
وانا متغمي كالعاده
ونكراني وبصالي
وبقرا العطف في عنيكي
وبتقولي كدا زياده
وهفضل برضه أنده لك
ودا قدري
أعيش العمر محتاجلك
ومشتاقلك
أيا نضري
بقى مش فاكرا واد أسمر
نحيل الجسم بتغندر
وكان عاشقك ومش اكتر
وكان عاملك حبابي عنيه
وشال قلبه وحطك فيه
بقى مش فاكرا ياخساره
بناتنا الحلوه في الحاره
كتير كانت ألاعيبهم
وحاسدني وحاسدينك
ودا عيبهم
وفاكريني بأشعاري
باداعبهم
غاروا منك ومش فاهمه
قالوا عاشق ودي تهمه
وقالوا عني مغزلجي
وبكتب شعر ف عنيكي
وهمي إنني ارضيكي
وبرضه لسه مش عاجب
بقى ناسيه؟
أيا قاسيه!!
ولسه برضه مش فاكره ؟
قصيدتي الأولى ياسمرا
وانا صغير
كلام تافه !! كدا قالوا
دا واد متوول ومتحير
وكانوا كلهم واهمين
ومش فاهمين
وانا قاصد جميع قولي
ولايمكن يوم اتغير
وترمش عيني وادير
سكبت العشق في حروفي
وواضح في الهوى خوفي
عليكي ...وانتي شغلاني
وفاكرك.... وانتي نسياني
بحبك وانتي هاجراني
ونرجع تاني للمولد
وتشريدك وتشريدي
ليوم مافلتي من ايدي
آدي بداية حكايتنا
بدمي الحر هسقيها
وهحكيها لكل الكون
آدي بداية حكايتنا
بدمي الحر هسقيها
وهحكيها لكل الكون
عشان الكل يعذرني
إذا عشقك بيأسرني
ويسحرني ويجبرني
أعيش العمر مستني
ومستنظر
بلهفة طفل عاش عمره
يجيه اليوم وشوف امه
وتاخده في حضنها تضمه
تِنَسيه الزمن الاغبر
وقسوة بٌعدها المره
ودا كله بيجبرني
وسامحيني إذا بأذيك
أشك في شيء محيرني
تكوني طفشتي للزهره
وانا دايخ في كوكبنا
ألف عليك
يمين وشمال مابقيتشي
سألت عليك ما مليتشي
ماخليتشي
لأني ف حبي مش جاحد
فهل فعلا أنا واهم ؟ !
ومش فاهم !
وحبي من طرف واحد ؟
أنا ف عرضك
دا انا عِرضك وانا أرضك
وفيه عاقل يفوت أرضه ؟
يجوز برضه !!!!
********
كتير قالوا و م الأول
بأني في الهوى طايش
وعشقي في الخيال عايش
ودا قولهم ... ودا طبعي
ولايمكن يوم اتحول
قالوا لك مين ؟؟
وبرضو تاني مش عارفه؟
وقلبك فين ؟
مفيش مره في يوم قالك
حبنا كان نبع صافي
مش تسالي ف نظرتين
وف براءة طفل بلعب
ويا طفلة لما كانوا صغيرين
****
آدي قصتنا في المولد !
بقالها كتير ؟؟؟ ! !
وبرضو تاني مش فاكره ؟
باقي شهرين ! !
ويكمل بيا في بعادك
عامي العشرين!
أنا ياسكره فاكر
وهفضل عمري مش ناكر
قابلتك فين ؟ !
أنا لاحبي كان صدفه
ولا كنا شباب طايشين
ويشهد لي ضفاف نيلك
في عز البرد بنداهلي
في ضي البرق باجريلك
أرد الدين!
وتستاهلي
أخيراً
:
:
:
أخيراً قالوا فيه لمه
وفيه مولد وحشد كبير
وفيه ثوره
لناس حره
وخلق كتير
شاغلهم نفس حرمانك
ملوا التحرير
فروحت بروحي وياهم
ومديتلك انا دراعي
لمحتيني ! !
في وسط الهيصه والزحمه
عرفتيني ! !
لقيت الكل عاشقينك
وحابينك وشاريينك
وانا معاهم
وأقسم إني محتاجلك
ومشتاقلك تضميني
ولايمكن هيرضيني
سوى حضنك يدفيني
كما اعتدتك وانا صغير
بلمسه من حنان إيدك
تريحني
وهمسه بحس تنهيدتك
تفرحني
وحاسك عاوزه تتعاتبى
ودا وقته ؟!
كلامك نبضه جوايا
بدون ماتقولي صدقته !
وأنا آسف وسامحيني
واكون ممنون
أقولك وانتي سمعاني
بحبك وانتي عشقاني
وفاكرك وانتي ضماني
وفارد في الهوا جناحي
وبحلم بيك وانا صاحي
ياعز الدنيا ياحره
يافخر الكون
الرئيسية 
