مسرحية .. فصل واحد ...!!
***
من كلمات
**
الطبيب الشاعر / د. محمد رزق
*
*
*
قـُلنا ثورة ..؛ قـُمنا ثورة
والقلوب كانت بـِتـِرجـِف مِ المِـحاورَة
والدموع كانت بـِتِـنزف مٍِ القـنابـِل
دَمِّنا بـِالحُب سايـِل ،
حُـبـِّنا عامِل عَـمايـِل ..!
يـِغلِـب الخوف اللى كان جوَّانا حايـِل ،
بين إرادِتنا وشموخنا ؛
بين عِـيالنا وبين شيوخنا ؛
ضارب الحق ف نافوخنا ..،
قـُمنا قـُمنا ..؛!
سِـبنا نومنا ..؛!
والكِـتاف زَقـِّت همومنا ،
والشموس بانِـت ف يومنا ،
تِكتِب السبورة بُكرة ،
تِمسَـح الماضى البشاورة ..
مسرحية .. فصل واحد ،
والسباق كان بس دورة ..
***
قلنا ثورة ..؛ يعنى وحدة ،
يعنى كلمة صدق واحدة ،
يعنى نبعد كل فاسد ،
يعنى نقدر ع المناورة ..؛
واللى يتعب يوم نشيلـُه ،
واللى يـِقـدَر نشتكيلـُه ،
واللى يبعد عن طريقنا
من قلوبنا حَ نـَّاديلـُه ،
يعنى كل الدنيا تعرف ،
إننا أد المغامرة ..؛
مش بنلعب فى التحدى ،
أو بـِنـِخسَـر فى المقامرة ،
والدوافع ألف دافع ،
مش حـتِـغلبها المدافع ،
والمكايد والمؤامرة ،
مسرحية .. فصل واحد ،
والسباق كان بس دورة
***
دُرنا دَورة ، بَرَّة دورة ،
ف السباق وطلِعنا بِرَّة ،
زَى ماتكون النفوس كانت ف جَرَّة ...
والإيدين سابـِت إيديها
والعيون نامِت عينيها ،
واللى ناهـِب مِ البَـلـَدِّى* ( *البلد دى )
بـِيعانِدها وبـِيعاديها
واللى صابـِر ع التـَّحَـدِّى
بـِيهاوِدها وبـِيداديها
بس إيد الشر طايلة
تِـنهـَب الخير اللى فيها
واللى باقى مش مِكـَفـِّى
واللى قايـِد مِش مِطـَفـِّى
والحياة فى الغـُلب مُـرَّة
والفساد مادِد جدوره
عَ العِـباد فارض غرورُه
والضـَّلام بـِيطـَفـِّى نوره
واللى عايـِش بـِالمَـبادئ
لِـسـَّه ماسِـك ألف جَـمرة
مسرحية .. فصل واحد ،
والسباق كان بس دورة
***
تـِيجو نـِنسَـى ..!؛ تـِيجو نـِرجَـع ..!؛
تيجو نِـسمَح لِـ اللى خانوا ،
يـِضربوا ، والضرب يـِوجَـع ..!؛
تـِيجو نـِتأسَّـف لِـغادِر ،
نِـعـتِـرِف ، والغـَدر يـِنفـَع ..!؛
تـِيجو نِـقـتِـل حِـلم بـُكرَة ؛
والأمـَل ، ونـسيـبها تِـولـَع ..!؛
واللا نِـرجَـع للبـِداية ،
والتـَرابـُط والتـَّحَـدِّى ،
قـَبل ماتكون النهاية ،
بـِالفـَشـَل أو بالتـَّرَدِّى ؛
يـِنـتِـصِـر فيها اللى خاين ،
واللى بايـِع ، والتـَّعَـدِّى ،
والسـِّتارَة السودا تِـنزِل
عَ الكرامَة ، وعَ المُـظاهرَة ...!
لـَو حَ يـِكمَـل فـَصل واحِـد ،
تـِبـقـَى عاشِـت مَـصر حـُرَّة ؛
بَـس يـِبقـَى الكل واحِـد ،
زى أوِّل يوم فِ ثورة .
***