يا شعب حاسب
الطبيب الشاعر : د / محمد رزق
اطلـَع ياحُـسـنى قول لِـنا
سامحوا نسامحك
أصل انتَ مَصرى زَيـِّنا
حَـتـَّى ف مَلامحَـك
بَـس انتَ ناهِب حَـقـِّنا
وازَّاى نِـصالحَـك
***
كـُنت انتَ تاكـُل
والجَـميع مِـش لاقِى لـُقمَة
كـُنت انتَ تِـلـبـِس
والجَـميع مِـش لاقى هِـدمَة
طول ماانتَ شايـِف
مِـش مُـهـِم الباقِى يـِعـمَى ..!
***
كـُنت انتَ تاخـُد رِزقِـنا
تِـدِّيه لِـناسَـك
وان يوم فـَتـَحنا بُـقـِّنا
تِـنزِل بـِفاسَـك
طول السنين بـِتهـِدِّنا
وتـقـيم أساسـَك
***
بَـس المِـسامِح رَبـِّنا
لـَو كـُنت عايـِز
رَجَّـع حـقوقـنا كـُلـِّنا
يـِمكِـن وجايـِز ..!
نِـصفـَح ونِـفـتـَح قـَلبـِنا
وانتَ اللى فايـِز
***
هات اللى كـُنت مهـَرَّبُـه
رَيَّـح ضـَميرَك
فوق المَلايكـَة بيـِحـسِـبوا
والموت مَصـيرَك
وازَّاى تدوم لـَك ؟ ،
عُـمرَها دامِـت لِـغـيرَك ؟!
***
نـَفـَّض جـيوبَـك م الرَّصيد
إنتَ ورجالـَك
وابدأ معانا مِن جـِديد
كـَمِّـل نِـضالـَك
دا الفـَجـر هالِـل مِـن بَـعيد
وبـإيـد عِـيالـَك
***
الله عَـليكـُم ياشـَباب
مَـصر العَـظيمَة
أحلِـف بـِرَبى والكتاب
إنـتـُم غـَنـيمَـة
وانتوا اللى فـُزتوا واللى خاب
( شـَمـشـون ورِيـما )
***
ياخـَلق فـوقوا وافهـَموا
أصل الحِـكايَة
لـَمَّـا النهاردَة تسَـلـِّموا
تِـبقـَى النـِّهايَة
والحَـق نِـبقـَى بنِـعـدموا
وتكون بـِدايَة
***
لِـلظـُّلم تانِى مِن جـِديد
وِلكـُل غاصِـب
يـيجـِى القـُرَيـِّب والبَـعيد
ياخدوا المَناصِب
حاسِـب عَـلـَى الفـَجر الوَليد
ياشـَعب حاسِـب ...!
الرئيسية 
